7 Stages Of Love

Nadaan dil ki daastan aaj sunaati hoon
Dil ki kitaab mein kuch panne dhakh ke, daba re rakhkhe they
Woh afsaane aaj sunati hoon
Chalo, aaj unhi panno ko tumhe khol ke dikhaati hoon

Ek ajnabee na jaane kab kaise

Apna bana gaya

Aisi kashish thi uski awaaz mein

Rahi na main apne hosh-aur-hawaaz mein

Aankhein mili, aur dil khoya

Uski baaton mein, yaadon mein

Yeh nadaan jaane kitni raatein na soya

Uski dilkashi ka kuch aisa asar hua

Dil, jigar mera iztiraar hua

Yoon khinchi chali ke ruk na paayi

Unki rokti aawaazon ko bhi sunn na paayi

Phir aisi aage badi ke peeche mud ke dekh na paayi

Ishq ki khumari kuch aisi chadhi

Main saath samandar paar chal padhi

Na raha koi shaq, na raha koi parda

Uns ke rango mein main aisi dhali

Loo ko barkha samajh main yoon hi khadi rahi

Ahsaas bhi na hua kab dhoop chubne lagi

Bhaagi main, daudi main, 

Aankhein moond chalti chali main

Rango se bhara tha yoon aashiyaana mera

Band darwaazon mein kahin kho gayi main

Par ek khla tha kahin

Uski sisakti cheekhein bhi sunn na paayi 

Main aisi aage badi ke peeche mud ke dekh na paayi

Jisna haseen utna qatil hota hai yeh

Har zakhm ki, har marz ki dawa hota hai yeh

Pehli barsaat ke baad mitti ki khushbhoo ki tarah

Zindagi zarf ka tassavoor banaata hai yeh

Yeh ishq hi toh hai

Zindagi ko mukammal, noorani banata hai yeh

Ismein chal, dikhawa nahi

Par beparda bhi nahi hai yeh

Yeh woh aandhi hai

Jo shuruwat mein lagti suhaani hai

Par kabhi kabhi, gharonde ujaadta hai yeh

Iski aandhi ki thar thar aisi huyi

Iss andhi ki thartharat main samajh na payi

Ibtida tha yeh ek toofan ka, main dekh na payi

Main aisi aage badh aayi ke peeche mud ke dekh na payi   

Ishq ki qata hoti itni gehri hai

Har gumaan ko, har shaq ko kahin dafna deti hai

Iske lehje mein woh nasha hai

Jo bas chadhta hi jaata hai

Par jab yeh nasha utarta hai

Dil - jigar cheer ke chala jaata hai

Ek aisa fariaibi bhi hai yeh

Yeh ek mukhauta pehen ke aata hai

Yeh woh shaitaan bhi hai

Jo bina kisi bandish ke bhi

Apne mein baandh ke le chalta hai 

Ek aisa farishta bhi hai yeh

Khudki mohabbat, akidat ka ahsaas bhi dila jaata hai

Par kambakht parkahna nahi sikhata 

Main shayad yeh kabhi jaan na payi

Aisi daldal mein phansi ke chah kar bhi, peeche mud ke dekh na paayi

Ghul ke beech kahin ek sukoon ki woh ghadi

Ek hamsheerah jo mera saath dene chal padi

Ek salahiyat jisse ghaant bandh chali main

Jaise daraf ka tanaah jadi se bandh jaata hai  

Khud ki ibaadat mujhse hi toh ibtida pata hai

Phir chal padi mein sher ki ghufa mein 

Jaane kya hi soch rahi thi main, na ruki, na hichkichayi

Chalti chali aise ke peeche mud ke dekh hi na paayi 

Ek sone ka pinjra, peetal nikla jiska sona

Ghair mulki zameen, 2 ghaz ka kona

Uss kone mein kahin shayad tha meri qismat ka rona

Uss kone mein chupi thi kahin ek chaabi

Mere pehredaaro ko na khabar zara bhi

Par kab tak chipti kat tak chipaati

Dastak dene aa chuki thi ab shayad kisiki tabahi

Asbab tha bas pinjra tod nikal padhne ka

Par manhoos waqt kahaan martaba karne walo mein tha

Junooniyat ne maano ek nayi sabah dekh li

Ehad mera jalal ban chuka tha

Afsano ke mazmoon aakhir kya hote hain

Bas yahi jaan-ne main chal padi, yahi gunah tha mera shayad

Phir aisi phansi ke pinjra todne ke auzaaro se hi chil gayi

Darr ka kalas ab yeh tha, ki royi, gidgidaayi, 

Par itni masroof thi main ki main ruk hi na paayi

Har umbre ke aage ek asbaah hai

Har shab ki ek subah hai

Beete lamho mein agar aansu hain toh shayad ek sabaq bhi 

Shayad ek naye kal ka sabab bhi

Uss sabaq ko ab seene se legaye chalti hoon

Khud se ek qurbat mehsoos karti hoon

Maut shayad bas ek justajoo hai

Zindagi ki sataish se karti rubaaro hai

Itni mohabbat mere aas paas hai, shayad yahi seekhna baaki tha

Ab isse yoon saath liye chalti hoon,

Naye khwaab, har roz bas yahi muraad karti hoon

Iqbal mandi ka ab woh baagh mila, ke chalti chali

Apne uchalte kadmo ko rok na paayi 

Inteha

Na shikwa hai na ghuma hai

Mohabbat ki yeh kaisi intehaa hai

Jo lab khilke muskura na sakein

Jo aansu khul ke beh na sake

Unki yeh choti si daastaan hai

Band kamron ki siskiyaan

Darwaze ke pare sunn na sake

Woh toh itne bedard nikle

Ke zakhm dekh ke malham toh le aaye 

Bas laga na sake

Par aaj bhi yahi kahengey

Na shikwa hai na ghuma hai

Zaalim teri mohabbat ki yeh kaisi intehaa hai

Hum palkon mein dard chupate rahe 

Aur mehfilo mein thahake lagate rahe

Sajti shaamon mein aake woh dil humara yun cheer ke le gaye

Aur hum toh muskura ke yeh bhi na keh sake

‘aye zaalim zara palat ke dekh, mere dil ke kitne tukde bikhar gaye’

Bachpan Ka Muntazir

 

Bachpan bahut pyara hota hai, nahi

School mein last bench pe tiffin 

Dopehar ki neend

Shaam ki lukka chuppi

Tinde ki sabzi banne pe muh banana 

Phir daanth khaake wahi tinde khaana

Phir wapas yahi karna, rozana

Bachpan ki ek aur cheez badi pyari hoti hai

Sapne

Wohi sapne jo hip hip hurray aur school days ke saath dekhe

Wohi sapne jo mummy ke tv serials ne dikhaye

Thodi ladayi, thodi ruswayi

Dosto ka wahi roothna manana

Anjaan logon mein apno ko panna

Par phir wahi bachpan

Chupke se chalaki se

Haqiqat se rubaru karake kahin kho sa jaata hai

Waqt ke sahare chodh, 

Zindagi ke chaurahe pe akela kar jaata hai

Dheere dheere sab hi chale jaate hain

Koi padhayi ke liye toh koi alag zindagi banane ke liye   

Toh koi bas apne gham seene mein dabaye 

Ujaad ban ke reh jaata hai

Jitne apne hote hain

Sab rang dikhane lagte hain

Ghadi ke kaantein jaise dheere dheere saare mukhote utaar dete hain

Aur kahin na kahin ek muntazır bas raah dekhta reh jaata hai

Kahin na kahin woh ek darwaza dhundta reh jaata hai

Bachpan ki masumiyat aur bharose ko

Har darwaze mein talaashta reh jaata hai

Kyuki, aakhir bachpan bahut pyara hota hai

Galti se reham ko nawazish samajh leta hai

Do pal pyaar ka meetha bol bolne wale ko

Apna smajh baithta hai

Yeh wahi muntazir hai jo har choti cheez mein

Kahin khoyi huyi muskaan dhundne  lagta hai

Kyuki yeh wahi hai, jo dhoke khake baitha hai

Bharosa jitna toota utna aur karne baitha hai

Thokre khaayi hain bahut par kahin ka kahin

Anjaano mein rishta banane baitha hai

Umeed toh inki masha allah hai

Kyuki koi inke khule zakhmo ko qured bhi de

Toh unhi ki tarafdaari bhi karne lagta hai

Koi zubaan se teer chala de 

Toh seena chalni karne ko taiyaar baitha hai

Yeh toh wahi bewakoof hai 

Jo jaanta nahi, jo khudka nahi, uska koi nahi

Yeh wahi beghairat hai

Jisse char thokre maardo phir bhi 

Dar pe muskurata baahein phelata aa jaata hai

Yeh wahi kamzarf hai jo samajh nah paata 

Apna koi nahi hota

Woh kahaaniyaan kisse jisse seene se lagaye baitha hai

Woh likhe bhi kisi muntazır ne hi they

Dhund toh woh bhi apna bachpan hi raha tha

Kyuki aakhir bachpan dhoka hi sahi

Par bachpan hi toh sabse pyaara hota hai

Akel Kya Hoti Hai

 

Akel kya hoti hai, jaante ho?

Akel woh nahi jo bandish mein mehsoosh hoti hai

Akel woh nahi jo aakhein namm kar jaati hai

Akel woh hai jo shama ke paas pahunchke bhi parwane ko jala deti hai

Jab tulu-e-aftab ki roshni dikhti jaroor hai 

Par ghurub ka ehsaas dilati hai

Jab aankhein khulti jarur hai

Par phir band hone ki raah dekhti hain

Jo manzil toh dikhati hai

Par raaste jala deti hai

Akel woh seher hai 

Jo shabh banke aati hai

Jo muskaan toh dikhati hai

Par siskiyaan daba jaati hai

Jo kisika kaandha toh ban jaati hai

Par khud ka bhaar sambhal nahi paati hai

Akel woh zeher hai

Jo aab-e-hayaat banke aati hai 

Yeh woh lughat hai 

Jiska koi ustad na bane, yahi behtar hai

Yeh woh jallad hai

Jo tasdeeq karne ke bahane aake jaan nikal leta hai 

Yeh hilal banke aata hai 

Roshni ka tassavur dikha ke

Zinda dafna jaata hai

Yeh akel hi hai 

Jo apni siskiyon ka shor khud hi sunn nahi paata hai

Yeh aisa naqaab pehnaata hai

Jo sabki raqas banake chalata hai 

Koi maanega nahi

Ishq nahi, yahi woh sinf-e-sukhaan hai 

Jo har shayar ko shayar banata hai
Janaab, yeh akel hi toh hai

Jo jeete-ji, jism se rooh alag kar jaata hai

Bekhabar Aur Barbaad

Bekhabar tum betaab main

Tumhare ishq mein barbaad main

Tumse ladh bhi li, jhagad bhi li

Wajah bewajah ulajh bhi li

Sab kuch bol diya

Bas woh na boli jo tha dil mein dafna liya

Bas, choti choti baaton se dilko bhi behla liya

Apne haal ko dekh ab sochti hoon bas

Kab tak rahoge bekhabar tum aur betaab main

Aur tumhare ishq mein barbaad main

Har lamhe mein tumhari khairiyat maangi

Har tarah tumhari khushi hi chahi

Kai baar toh chup chup tumhare liye duaaein bhi maangi

Maangi to apni rehaayi bhi

Bas jo na maangi, mili woh judaai bhi

Aaj bas kalam ke sahaare do bol nikal jaate hain

Inn panno pe dil ke raaz khul jaate hain

Ek anjaan awaaz mein chain paa jaate hain

Tumhe kya hi batayein

Kitne bekhabar ho tum aur betaab main

Aur tumhare ishq mein hoon barbaad main

Khaamoshiyon mein khwaab sajaye

Bandh aankhon se dekh dekh

Apne dil ko bas aise hi manaaye

Sabke thahako ka mauzu bhi bani hoon

Tumhari chidhan ka nishaana bhi rahi hoon

Phir tumhare saath hi mehfooz rahi hoon

Tumhara haath apne haathon mein lene ko tadpi hoon

Aaj bhi uss ummeed mein baithti hoon

Kabhi yaa toh tumhe dil khol ke dikha doon

Ya waqt ke saath tumhaari yaadein mita doon

Tab tak ho bekhabar tum aur betaab main

Tumhare ishq mein bas yu hi barbaad main

Humare khel, kilakaariyaan, ladaaiyaan saari yaad hain

Tumse ruswa hone wali saari ghadiyaan aaj bhi yaad hai

Jis raaste ko na palat ke dekhne ki kasam khaayi thi

Uss raaste par hi socha tha, ke shayad aage badh aayi thi

Par aaj bhi tumhara mere liye rakhkha hua woh ka scorecard yaad aata hai

Bas tumse baat karne ki himmat

Yeh dil nahi juta paata hai

Isliye aaj tak ho bekhabar tum aur betaab main

Aur tumhare ishq mein ho rahi hoon barbaad main

Tum Majnu nahi phir bhi tumhari Laila bane baithi hoon

Tum Farhaad nahi par tumhari shirin bane baithi hoon

Chahke bhi tumse chidh nahi paati

Tumhari jagah, woh mohabbat kisi ko de nahi paati

Jaane aisi kaunsi deewangi sar pe chadh gayi

Itne saal beeth gaye

Par main aaj bhi wahi khadi reh gayi

Kaise batau, ho kitne bekhabar tum aur betaab main

Tumhare ishq mein ho gayi kitni barbaad main 

Yeh Raat

Kabhi khil khila ke hasati

Toh kabhi rula jaati hai

Yeh raat bhi gazab julm dhaati hai

Itihaas ke panno mein saans phunk jaati hai

Seene mein dafn raazo ko khod khod ke nikaal laati hai

Sannaton mein siskiyon ko bhi aawaaz de deti hai

Yeh raat kitni ajeeb hai

Bas julm dhaa te jaati hai

Saare mukhoton ko kahin chhum se chupa jaati hai

Jaahan palto wahi tumhe ek aaina dikha jaati hai

Tum tairte reh jaaoge par tumse kinaara chhinte jaati hai

Yeh raat apne aanchal mein toofan leke aati hai

Badi jaalim hai yeh raat, sirf julm dhaane aati hai

Aankhon se neend chura jarur leti hai

Bas khaufnaak sapne yaad dila jaati hai

Ek sone ka pinjra banake

Tumhe uski chaabi se lalchaati hai

Ek toofan ki tarah aake

Yeh raat, bas julm dhaa jaati hai

Khudse sach bolne pe majboor kar jaati hai

Karwatein badalte raho

Par neend ko kareeb nahi aane deti hai

Har yaad, har zakhm, har baat ko taza kar jaati hai

Yeh sab kuch karne ke baad bhi

Ek sawaal zehen mein chodh jaati hai

Aakhir kyu? - isse tumhari soch mein durust kar jaati hai

Badi toofani hai yeh raat

Bas tumhara sukun churane aati hai

Pal bhar ke liye hasa ke,

Khoob rula jaati hai

Yeh raat bhi gazab hai, bas zulm dhaane aati hai

Aayi Hoon

 

Aaj bas chup chaap kisi kone mein baithne aayi hoon
Apni aap-biti aaj sunane aayi hoon
Akele baith baith ke thak chuki hoon
Jhoothe thahake maar maar ke khokli ho chuki hoon
Aaj bas kuch do pal tumse baantne aayi hoon
Haar gayi hoon par ladh rahi hoon
Ghut ghut ke saansein bhar rahi hoon
Aaj bas dil ka haal sunane aayi hoon
Kisi kone mein baith, aaj rone aayi hoon

Purane zakhm bharne aayi hoon

Kuch nayi yaadein banane aayi hoon

Barso ka sailab umadh raha hai

Dil par maano patthar bankar baith raha hai

Beete kal ko peeche chod, aage badhne aayi hoon

Koi ghila - shikwa karne nahi, bas dil halka karne aayi hoon

Apne-paraye ka fark bahut achchi tarah samajh chuki hoon

Apne hi haathon se apne aanshu poch chuki hoon

Sapne dekhne ka shauk purana tha, 

Apni asliyat, apni sachchai aaj apnane aayi hoon

Koi sahara nah tha kabhi, aur na hi maangne aayi hoon

Bas apne dum pe aaj wapas jeene aayi hoon

Par pehle, kuch der thamne aayi hoon

Do pal sukun se baithne aayi hoon

Bas, kuch minuton ke liye, ek kone mein baith

Do aansu bahane aayi hoon.